【社區服務 - 「維你平分」平等分享行動👐🏻】

到底平時嘅我哋係『看不見』，定係『不看見』👀？

維記喺11月23日（日）舉辦咗今屆第一次平等分享行動🙌🏻。當日參加者先喺觀塘集合，了解平等分享行動嘅理念💭。同時，大家亦睇咗一條關於前線清潔工嘅紀錄片，了解更多關於前線勞動長者嘅困境，對「看不見」、「不看見」、「睜開眼」亦有更多思考。隨即大家分享物資同超市現金券，整裝待發👣。

<牛頭角和觀塘地區不乏前線勞動長者 🧓🏼👴🏼👵🏼>

我哋一行19人，分成4組就出發！以街坊身分走進社區，希望將各種日常物品分享俾有需要嘅街坊。雖然大家拎住大包細包嘅物資🍞🪥🧻🍪，但都不忘四處張望，穿梭街巷之間搵街坊。每當離遠見到着住螢光黃色背心嘅工友、抑緊或鎅緊紙皮嘅長者蹤影，大家都會跑上前分享物資👣。有位伯伯喺物資中揀咗一頂冷帽 ，笑住話自己戴上去之後「睇落都幾有型」！亦有清潔工接過乾糧後話自己「終於可以有第一餐啦 」。

活動過後，參加者都進行咗感受分享：行動期間遇到唔少清潔工，佢哋都感受到自己做緊一份有尊嚴嘅工作；大家亦不約而同講到，喺行動期間遇上好多真摰笑容同交流 💬。更有參加者分享自己印象最深刻嘅畫面：佢遇到一位拾荒長者係接過物資後感動流淚 🥲。「將社會的物資，重新分享到有需要的人手中。」—— 呢個正正就係Benson Tsang當初提出平等分享行動嘅意義🙏🏼。

當日，感謝 @jyut6jyut6jyut6 慷慨借出場地，俾我哋做集合同感受分享嘅地方。講到物資，我哋今次更收到四方八面嘅心意 💕，包括我哋一班親朋社友嘅現金捐助；亦再次有幸獲得加減乘除基金 @agentofchangehk 捐助嘅物資。🙏🏼